الشرح التقني و القانوني و الإداري لكارثة امي نتيارت

الشرح التقني و القانوني و الإداري لكارثة امي نتيارت:

تقنيا فيما يخص الجانب الهيدرولوجي المغرب كامل مقسم لأحواض مائية تايتسماو les bassins hydraulique، فحال الشاوية و بورقراق و سوس و بوسكورة و سبو ... من بين الأدوار ديالها هي دراسة الفرشة المائية و حقينة السدود و خصوصا هنا تدير دراسات على الوديان و تعرف الصبيب الماكسيموم و فشحال من ميترو تايفيض الواد إلى جات الحملة، من بعد تايدارو خرائط اللي تايرسمو فيها الحدود ديال الواد فين تايوصل و تايزيدو شي ميتروات سوكور تايتسماو zones tampon باش إلى سبحان الله شي مرة جا الواد و فات الماكسيموم ديالو اللي لقاو الحسابات يبقا البني و الباشار على خير. 

في الجانب القانوني وكالات الأحواض المائية ملزمة باش تعطي هاد الخرائط رسميا للوكالات الحضرية و وزارة التعمير ووزارة الداخلية، علاش؟ باش فوثائق التعمير يمنعو منعا باتا فديك البلاصة ديال الواد يكون البني و الأنشطة التجارية،و وزارة الداخلية في شخص السلطة المحلية (القايد أو الباشا اللي مخدمين المقدميا) تراقب لا يمشي شي واحد يسخن عليه راسو و يبني فدوك البلايص، دوك البلايص تايتسماو zones non-aedificandi و مايتعطاوش تراخيص البناء تما.

في الجانب الإداري الجماعات الترابية باش تدير تيران خاصها تشري العقار بالتراضي من عند مولاه بالفلوس أو تدير مسطرة نزع الملكية وتحط الفلوس في المحكمة، و بطبيعة الحال هاد التيران ماخاصوش يكون فمنطقة الواد حيت إلى حمل غادي يدي الناس كاملين.

المشكل فين كاين؟ الجماعة الترابية بحكم أن  الجماعة لم تباشر مسطرة نزع الملكية و بالتالي تايشوفو جنب الواد حيت الأرض فابور تايبنيو ليهم تيران و يخليو الناس يموتو.

حاجة أخرى  الناس اللي تايبنيو فجنب الواد راه تايتلاحو على الأرض حيت الوعاء العقاري غير محفظ و ماديال تاواحد و تايبنيو عشوائيا، بطبيعة الحال السلطة تاتحمل المسؤولية حيت المقدم خاصو يعلم القايد أو الباشا و يجيو يريبو ليهم الضالة و لكن يمكن كاين تواطؤ أو رشوة أو السلطة تاتميك حيت باغا السلم الإجتماعي و خلي الباشار يسكن و يهنينا، و لكن الواد ماتايعرفش السلم الإجتماعي... تايبقا ناشف سنوات و لكن tôt ou tard تايحمل، ذلك لأن المورفولوجية ديال التربة و هيدرولوجية المنطقة تاتسمح ليه بذلك، خاص غير شي عام تصب الشتا مزيان ولا يجي شي صيف سخون و يذوب الثلج في الجبال، و آنذاك تايجي سيدي الواد تايجمع كلشي.

بتصرف